Јотова загрижена за бугарскиот амандман за извештајот за Македонија - почна дебатата во ЕП

Запалените дипломатски возила пред бугарската амбасада се директен удар врз Бугарија обвинува претседателката Илијана Јотова. Ваквата изјава доаѓа во пресрет на гласањето во Европскиот Парламент каде треба да се одлучува по извештајот за напредокот на Македонија.

Јотова тврди дека се подготвува терен во последен момент да биде отстранет дел од амандманите од извештајот за напредокот на Македонија, кој се однесува на работата на заедничката историска комисија.

Во Европскиот парламент почна дебатата за извешатајот за напредокот на Македонија. Известувачот Томас Вајц порача дека земјата е подготвена да ги спроведе реформите кои ги бара Европската Унија, затоа треба да следат и награди како постепена интеграција во единствениот пазар и во европската роаминг зона.

Шефицата на Европската Комисија ги повика лидерите од регионот да ја искористат можноста за полноправно членство.

Бугарските европратеници пред колегите се обидоа да ја нападнат Македонија велејќи дека ги крши човековите права на бугарите споменувајќи го последниот случај со запалените возила и побараа силен одговор од Брисел. Се обидоа и да говорат на македонски тврдејќи дека бил бугарски дијалект.

Дебатата во Европскиот Парламент по извештаите за напредок на земјите од Западен Балкан продолжува утре со конечно гласање.