Сиднеј ја регистрира најтоплата зима откако се води евиденција

Додека Европа доживува исклучително топло лето, Австралија истовремено известува за зима со рекордни високи температури, јави ДПА.

Сојузните држави Викторија, Нов Јужен Велс и Тасманија ја доживеаја својата најтопла зима откако се води евиденција во 1910 година, соопшти денеска националната метеоролошка служба (BoM).

Низ целата земја просечната температура беше за 1,45 степени над просекот од периодот 1961–1990 година – што е трета највисока измерена вредност за овој период од годината.

Во Сиднеј, на источниот брег, температурите често беа речиси пролетни. „Australian Guardian“ го цитираше климатологот од BoM, Сајмон Грејнџер, кој изјави дека просечната температура изнесувала пријатни 15,3 степени.

Претходниот рекорд од 15 степени беше поставен во 2013 година. Мелбурн и главниот град Канбера исто така регистрираа исклучително високи температури.

Според метеоролошкиот експерт, температурите над просекот веројатно ќе продолжат и во австралиската пролет, која сега почнува.

Се очекуваат необично високи дневни и ноќни температури во големи делови од земјата, рече Грејнџер. Климатскиот феномен Ел Нињо, кој се интензивира, игра улога во ова и се очекува да го достигне својот врв во доцна пролет или лето, рече тој.

Малите количества снег имаат последици и врз туризмот, па скијачките центри во Викторија и Нов Јужен Велс мораа предвреме да ја затворат оваа сезона.

МИА