Џејсон Кид стана косопственик на Евертон

Легендарниот американски кошаркар и актуелен тренер на НБА тимот Далас, Џејсон Кид, стана еден од косопствениците на англискиот премиерлигаш Евертон.

Кид се приклучи на компанијата Roundhouse Capital Holdings, која е дел од групацијата Friedkin која го купи Евертон во декември лани.

„Чест ми е што се приклучив на сопственичката структура на Евертон во толку важен момент кога на повидок е нов стадион. Со светла иднина пред нас, ова е одлично време да се придружиме“, изјави Кид.

Во текот на својата играчка кариера, Кид беше една од најдобрите асистенти во лигата, десет пати настапи на Ол-стар натпреварот, во колекцијата има два златни олимписки медали, а во 2011 година со Далас ја освои шампионската титула во НБА лигата.

Евертон во моментов се наоѓа на 13 место на табелата во Премиер лигата и поголемиот дел од оваа сезона, како и претходните две, го помина во борба за опстанок, но доаѓањето на новите сопственици и најавената преселба на новиот стадион со 52.888 седишта на Брамли-Мур Док им даваат на навивачите причина за оптимизам пред следната сезона.