„Гринпис – Бугарија“ пријави над 170 нафтени дамки во бугарските води на Црното Море

Повеќе од 170 нафтени дамки и бродско гориво се регистрирани во изминатата година во бугарските води на Црното Море, со вкупна површина од 819 квадратни километри, покажуваат податоците на невладините организации „Гринпис – Бугарија“ и SkyTruth, пренесува БТА.

Резултатите се сумирани во интерактивна карта, соопштија од прес-центарот на „Гринпис – Бугарија“.

Нафтените дамки се откриени преку систем што користи сателитски податоци од Sentinel-1 на Европската вселенска агенција. Картата ги прикажува дамките во периодот од 6 јули 2024 до 26 јуни 2025 година, при што се вклучени само разлевања што се двојно потврдени од експерти на „Гринпис“ и SkyTruth по проверка со софтвер, објаснија од организацијата.

Експертите посочија дека дамките најчесто се резултат на испуштање на валкани води од бродови, контаминирани со нафта, бродско гориво, хемикалии и тешки метали. Овие води се собираат во најдолниот дел на бродовите, каде што се наоѓа машинското одделение. Кога бродовите испуштаат необработени отпадни води во морето, нафтата се шири на површината и формира дамки, појаснија од „Гринпис – Бугарија“.

Организацијата нагласува дека овие дамки го намалуваат квалитетот на водата, ги нарушуваат основите на синџирот на исхрана во морето и претставуваат ризик за животните.- Нафтените дамки често се потценуваат и не добиваат внимание колку големите нафтени разливања, коментира Мартин Томов, координатор на кампањата „Живо Црно Море“ во „Гринпис – Бугарија“. Според него, ова загадување ретко се евидентира во официјалната статистика.

Во почетокот на декември минатата година, „Гринпис – Бугарија“ го претстави документарниот филм „Јас, морето – живот во тишина“, кој има за цел да покаже дека Црното Море е уникатно, со посебни видови и живеалишта.

МИА