Девет лица фатени како пијани управуваат пловни објекти на Охридското Езеро

Полициски службеници од Полициската станица за граничен надзор „Охридско Езеро“, во соработка со Регионалниот центар за гранични работи Запад и инспектори од Капетанијата на пристаништа Охрид, вчера спроведоа координирана акциска контрола на пловните објекти во водите на Охридското Езеро.

При контролата, извршен е преглед на вкупно 63 пловни објекти, а кај 31 пловен објект и 31 лице биле констатирани 52 прекршоци. Најчестите неправилности се однесувале на немање задолжителна опрема, управување необележани и нерегистрирани пловни објекти, пловидба за време на забрана, управување без одобрение за пловидба, превоз на повеќе патници од дозволеното и неносење пловидбена дозвола.

По извршеното алкотестирање, кај девет лица било утврдено дека управувале пловен објект под дејство на алкохол.

Дополнително, кај пет лица кои изнајмувале педалинки била утврдена нецелосна примена на безбедносните правила при нивното изнајмување.

Од МВР информираат дека ваквите акциски контроли ќе продолжат и во текот на летната сезона, со цел доследно почитување на Законот за внатрешна пловидба и зголемување на безбедноста на водите на Охридското Езеро.