Вонредни контроли на ДСЗИ поврзани со илегалните ботокси и филери

Вонредни контроли на Државниот санитарен и здравствен инспекторат во медицински установи во неколку градови во државата – какви ботокси и филери користат за естетски интервенции. Надзорот следи по акцијата на МВР и Обвинителството за гонење на организиран криминал и корупција која засега заврши со 6 ефективни притвори, четири куќни и мерки на претпазливот за деветмина, осомничени за шверц на медицински средства со кои го довеле во опасност здравјето на граѓаните. А пациенти кои веќе имале вакви интервенции реагирале до надлежните здравствени власти.

- Имавме таков тип на информации и кај нас и во ДСЗИ. Знаете, постапката е во тек, не смееме ништо дополнително да дадеме бидејќи не сакаме да влијаеме на постапката која е во тек. Да, во моментот додека збориме инспекторите се на терен во неколку града во неколку институции, кога ќе имаме резултати, ќе известиме, изјави Азир Алиу, министер за здравство. 

Од Обвинителството за гонење на организиран криминал и корупција не знаат врз колку пациенти се аплицирани ботоксите и филерите кои без дозвола биле внесени во државата. Засега не се открива какви понатамошни дејствија ќе бидат преземени за случајот. 

- Ценам дека со акцијата се преземени дејствија во насока на отклонување на еден сериозен криминал. Не само од финансиски аспект, не само од аспект на оштетување на буџет, туку од аспект на заштита на здравјето на граѓаните. Така да би ги охрабрил во иднина и Бирото за јавна безбедност и обвинителството да продолжат во насока на отстранување на посебно криминал поврзан со загрозување на здравјето на граѓаните, вели Панче Тошковски, министер за внатрешни работи. 

Меѓу осомничените кои формирале криминална група за незаконски увоз на ботокси и филери има лекари од ГОБ 8-ми септември и клиниката за кожни болести, од приватни дерматолошки ординации, цариник, таксист.