Скандал во Бугарија: Жени тајно снимани во салони за убавина, снимките завршиле на порно-сајтови

Бугарското обвинителство започна истражна постапка откако беше откриено дека стотици жени биле нелегално снимани за време на интимни козметички третмани во салони за убавина, а видеоснимките подоцна биле објавувани на порнографски интернет-страници. Снимањето се вршело со скриени камери, во моменти кога жените често биле целосно разголени.

Дел од спорните снимки потекнуваат од 2023 година и во меѓувреме се прошириле на бројни порнографски платформи и Телеграм-канали.

Според обвинителката Марија Маркова, до полицијата во Бургас биле поднесени повеќе од 100 пријави. Аферата опфати најмалку два салона за убавина во Бургас и еден во Казанлак, а истраги се спроведуваат и во други градови низ Бугарија. Обвинителството потврди дека меѓу оштетените има и малолетнички на возраст од 15 до 17 години.

Една од жртвите за телевизијата „Нова“ изјави дека на почетокот препознала пријатели и роднини, бидејќи со години го посетувале истиот салон, а потоа почнала да се плаши дека и самата може да се појави на снимките. Таа го опиша искуството како понижувачко и вознемирувачко, истакнувајќи дека најголем страв ѝ е можноста некој друг да ја препознае.

Домашните медиуми пренесуваат дека меѓу жртвите има и јавни личности, меѓу кои судијка, обвинителка, новинарка, како и ќерки на регионален функционер. Дел од жените тврдат дека камерите биле поставени многу блиску и директно насочени кон нивните интимни делови, а некои наведуваат дека процедурите биле пренесувани во живо, при што гледачите плаќале пристап со криптовалути.

Полицијата ги сослушала сопствениците на салоните, како и сегашни и поранешни вработени, но засега нема приведени лица. Сопствениците ја отфрлаат одговорноста, а дел од нив тврдат дека безбедносните камери биле злоупотребени преку хакерски напад.