Антикорупциска со докази бара санкција за Груби бидејќи канцелариите ги користел за партиски цели

Вицепремиерот Груби ги користи просториите на Министерството за политички систем за партиски цели. Антикорупциската комисија поседува докази и ќе поднесе претставка до неговата колешка Грковска. Претседателката на ДКСК смета дека ова е прекршување на кодексот на етичко однесување на носител на јавна функција.

-Доставени се фотографии и линкови од Фејсбук страната на партијата Демократска унија за интеграција од кои е видено дека во просториите на наведеното Министерство се одржани средби на нивниот партиски лидер со претставници од странство, рече претседателката на ДКСК, Билјана Ивановска.

Груби и врати на Ивановска во негов стил.

-Изгледа е непребол зашто не ги добија тие канцеларии. Таков впечаток ми се добива, рече Груби.

Појаснува дека Ахмети бил пратеник во Собранието и од таа функција тој имал состаноци и со претставници од власта, но и со меѓународни претставници во различки државни објекти, меѓу кои и владата.

-Не гледам некоја голема одговорност, но ако е толкав голем проблем ова ќе видиме да не се повторува тогаш, рече Груби.

Груби беше критикуван од јавноста и кога со сопартијците играше фудбал и баскет во својот кабинет. Тогашното непочитување на јавното добро го правдаше со тоа дека сите амбасадори кои доаѓале кај него на состаноци секогаш играле со топка.