Келн го отпушти тренерот пред можното враќање во Бундеслигата

Двократниот германски фудбалски првак Келн го отпушти денеска тренерот Герхард Штрубер на две кола пред крајот на второлигашкото натпреварување, иако тимот е сè уште во одлична позиција да избори враќање во Бундеслигата од која испадна лани.

Келн го препушти првото место на табелата минатиот викенд откако ремизираше 1-1 дома со Регенсбург.

На две кола до крајот на сезоната, Келн е второпласиран со 55 бодови, еден помалку од водечкиот Хамбургер, но три повеќе од третопласираниот Елверсберг и четвртопласираниот Падерборн.

Директна промоција во Бундеслигата обезбедуваат двете првопласирани екипи и на Келн ќе му бидат доволни четири бодови од последните две кола во кои ги очекува гостување во Нирнберг в петок и домашен натпревар против Кајзерслаутерн на 18 мај.