ЕУ подготвува нов пакет санкции против Русија и дополнителна поддршка за Украина

Министрите за надворешни работи на Европската Унија денеска во Луксембург треба да разговараат за нови санкции против Русија и за дополнителна поддршка за Украина.

На дневниот ред се и конфликтот на Блискиот Исток, како и односите на Унијата со Кина.

Се очекува министрите да одобрат санкции против уште десетици бродови кои се дел од таканаречената руска „флота во сенка“ – термин што се користи за танкери и за товарни бродови кои Москва ги користи за заобиколување на санкциите.

Високата претставничка на ЕУ за надворешна политика и безбедност, Каја Калас, минатата недела изјави дека очекува министрите да се согласат и за воведување замрзнување на имотот и забрана за влез за дополнителни лица и организации кои ја поддржуваат руската војна против Украина.

На маса ќе се најде и 21-от пакет санкции на ЕУ, кој би можел да вклучува и забрана за влез во Унијата за руски војници кои учествувале во војната против Украина, но одлука за тоа се очекува во подоцнежна фаза.

Паралелно се водат разговори и за користење на 6,6 милијарди евра од европскиот воен фонд наменет за Украина. Исплатите од фондот претходно беа блокирани од поранешниот унгарски премиер Виктор Орбан.

Европската Унија пред викендот најави дека денеска ќе ги почне и формалните пристапни преговори со Украина и со Молдавија.

Иако Унијата формално ги отвори пристапните преговори со двете земји во јуни 2024 година, почетокот на суштинските разговори со Украина беше блокиран од Унгарија под водство на Орбан.

Покрај Украина, министрите ќе разговараат и за развојот на настаните на Блискиот Исток, вклучително и за можни мерки против Израел поради неговата поддршка за израелските доселеници на Западниот Брег и активностите во Појасот Газа.

Односите меѓу Европската Унија и Кина исто така ќе бидат една од главните теми на состанокот.

МИА