АХВ: Потврдени три позитивни случаи на вирусот на Западнонилска треска кај угинати гаврани

Во периодот од 24 до 27 август 2026 година, до Агенцијата за храна и ветеринарство (АХВ) пристигнаа повеќе од 130 пријави од граѓани за пронајдени угинати птици. Дел од пријавите се однесуваат на свежо угинати птици, но најголем дел се за птици кои се во напредна фаза на распаѓање и не се погодни за лабораториско испитување за присуство на вирусот на Западнонилска треска. Поради тоа, секоја пријава не може да резултира со земање примерок и лабораториско испитување.

Досега се добиени три позитивни лабораториски резултати. Присуството на вирусот е потврдено кај два угинати гаврани пронајдени на подрачјето на Скопје и кај еден угинат гавран пронајден на подрачјето на Ресен. Агенцијата за храна и ветеринарство ќе продолжи со спроведување активности за утврдување на епидемиолошката состојба и процена на ризикот од инфекции со вирусот на Западнонилска треска.

Активниот надзор ќе се спроведува на целата територија на државата и ќе опфати живина одгледувана за некомерцијални цели, односно живина во дворови и селски стопанства, птици кои се чуваат во затворени или оградени простори, како и одгледувалишта на водени птици во дворови и селски стопанства.

Апел до граѓаните на територијата на град Скопје

Имајќи предвид дека со досегашното следење на Западнонилската треска е потврдена циркулација на вирусот кај птиците на територијата на град Скопје, нема потреба од понатамошно лабораториско испитување на поединечни случаи на угинати птици на ова подрачје. Граѓаните треба да обрнат особено внимание доколку на исто подрачје, во краток временски период, забележат поголем број угинати гаврани или други диви преселни птици. Во таков случај потребно е да ја известат Агенцијата за храна и ветеринарство.

За поединечни случаи на угинати птици на територијата на град Скопје, граѓаните треба да се обратат до надлежните комунални служби, односно до ЈП „Комунална хигиена“, за нивно собирање и соодветно отстранување.

Агенција за храна и ветеринарство