Рокот за избор на претседател на Косово истекува утре или следуваат избори

Рокот што Уставниот суд во Приштина му го одреди на Собранието за избор на претседател на државата истекува утре, и во моментов нема договор меѓу партиите за тоа прашање.

Според одлуката на Уставниот суд, доколку претседателот на Косово не биде избран до 28 април, собранието автоматски ќе се распушти, а предвремени избори мора да се одржат во рок од 45 дена.

Движењето „Самоопределување“ што има најмногу пратеници во Собранието, но не доволно за самостојно да избере претседател, во саботата им понуди на двете најголеми опозициски партии – Демократската партија на Косово и Демократската лига на Косово – да номинираат три непартиски кандидати за претседател.

Предлогот сепак не ги приближи ставовите на Владата и опозицијата.

Демократската партија на Косово, втората партија по број на пратеници, ја отфрли понудата. Лидерот на партијата, Бедри Хамза, оцени дека тоа е „маневар“ на Самоопределување и повтори дека за ПДК прашањето за избор на претседател е „затворено“.

МИА