Политика: Цените во Србија се пониски од европскиот просек

Според најновите податоци од Европскиот завод за статистика – Евростат, Србија е меѓу европските земји со најниско ниво на потрошувачки цени, кои изнесуваат околу 62,5 проценти од просекот на Европската Унија. Само во одредени држави од регионот е поевтино, како што се Бугарија, Романија и Северна Македонија, додека највисоки цени се забележани во Исланд, Швајцарија, Норвешка, Данска и Ирска, пишува денеска Политика.

Сепак, економистите предупредуваат дека пониското ниво на цени не значи автоматски и повисок животен стандард, бидејќи цените во голема мера се поврзани со нивото на плати и продуктивноста на економијата. Затоа жителите на побогатите европски земји, иако плаќаат повеќе за стоки и услуги, честопати имаат поголема куповна моќ од граѓаните на земјите со пониски цени, благодарение на значително повисоките приходи. 

Евростат посочува дека зад просечниот индекс стојат големи разлики помеѓу поединечните категории на производи и услуги. Иако Србија се рангира меѓу најевтините европски земји според вкупното ниво на цени, цените не се подеднакво ниски во сите категории.

Така, кога станува збор за храна и безалкохолни пијалоци, цените во Србија достигнаа околу 96 проценти од просекот на ЕУ, што значи дека, според индексот на цени на Евростат, прехранбените производи се поскапи тука отколку во бројни земји од регионот и Источна Европа, како што се Бугарија, Романија, Полска, Чешка, Словачка, Северна Македонија, Босна и Херцеговина и Турција.

Во исто време, потрошувачката електроника во Србија е околу 30 проценти поскапа од просекот на ЕУ, додека цените на апаратите за домаќинство се околу 11 проценти повисоки од европскиот просек. Спротивно на тоа, цените на енергијата се околу 49 проценти од просекот на ЕУ што значително го намалува вкупниот индекс на потрошувачки цени и ја рангира Србија меѓу земјите со најниски трошоци за електрична енергија и греење во Европа.

Токму затоа економистите предупредуваат дека целокупното ниво на цените не секогаш ги одразува реалните трошоци на секојдневниот живот, бидејќи одредени категории, како што се потрошувачката електроника и апаратите за домаќинство, веќе го достигнале или надминале просекот на ЕУ, додека други, како што е енергијата, сè уште се значително поевтини од европскиот просек.

Кога станува збор за храна и безалкохолни пијалоци, највисоките цени се забележани во Луксембург, каде што се околу 22 проценти над просекот на ЕУ, додека во Романија се околу 20 проценти под просекот. Безалкохолните пијалоци се најскапи во Ирска, а најевтини во Италија, додека алкохолните пијалоци се најскапи во Финска, каде што се повеќе од двојно поскапи од европскиот просек, а се и меѓу најпристапните во Италија. 

МИА