Истражување на Галуп: Во Србија само 27 проценти од граѓаните веруваат дека 2026 година ќе биде подобра

Во Србија, само 27 проценти од граѓаните веруваат дека 2026 година ќе биде подобра, додека глобално 37 проценти од испитаниците веруваат во тоа, според анкетата на меѓународната асоцијација „Галуп Интернешнл“, која оваа година опфати 60 земји и територии и повеќе од 59.000 испитаници.

Во Србија, 38 проценти од испитаниците очекуваат полоша година, 34 отсто анкетирани очекуваат дека ситуацијата нема да се промени, објавува „Галуп“ и додава дека песимизмот е уште поизразен кај мнозинството од нејзините соседи.

Речиси половина од српските граѓани, или 49 проценти, очекуваат економски тешкотии во наредната година, додека само една петтина очекува дека наредната година ќе биде подобра за економијата.

Кога станува збор за глобалната стабилност, речиси половина од српските граѓани очекуваат следната година да биде попроблематична - 46 проценти, а само една петтина очекуваат помирен период.

Во резултатите од глобалното истражување, 37 проценти од испитаниците веруваат дека 2026 година ќе биде подобра, една четвртина очекуваат да биде полоша, а речиси една третина дека ситуацијата ќе остане иста.

Оптимизмот е на највисоко ниво во Кенија, каде што 78 проценти од испитаниците сметаат дека ќе биде подобро, наведува Галуп. Од 60 земји вклучени во истражувањето, 40 имаат позитивен индекс, односно преовладуваат луѓе кои очекуваат подобра година.

МИА