Иран контра Трамп: Нема средба со американските претставници во Доха, туку само со катарски

Иран соопшти дека нивната делегација денеска ќе се сретне со катарските медијатори за да разговараат за преговорите со САД, откако Техеран и Вашингтон се согласија за меморандум за разбирање за ставање крај на војната на Блискиот Исток.

Иранските претставници ќе отпатуваат во главниот град на Катар, Доха, но го побија тврдењето на американскиот претседател Доналд Трамп дека ќе се одржат директни разговори.

Катар, исто така, објави дека не се планирани состаноци на високо ниво или директни разговори меѓу долгогодишните непријатели.

Иран вчера објави дека нема да се сретне со високите американски претставници кои долетаа во регионот по избувнувањето на непријателствата, загрозувајќи ги изгледите за траен мир меѓу двете земји.

Иранските претставници, исто така, рекоа дека двете страни сè уште треба да ги договорат условите на примирјето што го потпишаа пред две недели пред да можат да се справат со потешки теми, како што се можните ограничувања на нуклеарната програма.

Настаните покажаа дека двете страни се многу одалечени во клучните делови од почетната рамка, која го повикува Иран да го укине притисокот врз Ормуската Теснина во замена за финансиски стимулации и воспоставува 60-дневни преговори за постигнување траен мировен договор, пишуваат британските медиуми.

Зетот на американскиот претседател Доналд Трамп, Џаред Кушнер, и претставникот Стив Виткоф пристигнаа во Доха на она што Белата куќа го опиша како разговори на „високо ниво“, но Иран и домаќинот Катар изјавија дека ќе се сретнат со медијатори, а не со самите Иранци.

Катар соопшти дека премиерот шеикот Мохамед бин Абдулрахман ал-Тани бил меѓу оние што се сретнале со Виткоф и Кушнер.

„Не е закажан состанок со американската страна на кое било ниво за наредните денови“, изјави портпаролот на иранското Министерство за надворешни работи, Есмаил Багеи.

Двете земји требаше да започнат технички разговори на пониско ниво, според Маџед ал-Ансари, портпарол на Министерството за надворешни работи на Катар.

Барајќи начини за прекин на застојот, Трамп размислувал за враќање на тоталната војна и разговарал со министерот за одбрана Пит Хегсет и началникот на Здружениот штаб на војската, Ден Кејн, за спроведување дополнителни напади, објави „Волстрит џурнал“, повикувајќи се на американски извори запознаени со дискусијата.

Ројтерс не можеше веднаш да го потврди извештајот.

Но, засега, Трамп, кој јавно му се закани на Иран со повеќе напади, одлучи да ѝ даде повеќе време на дипломатијата, се наведува во извештајот.

Бродскиот сообраќај делумно е обновен низ мореузот, кој порано транспортираше една петтина од глобалната нафта и течен природен гас пред почетокот на војната на 28 февруари.

Но, иранските власти рекоа дека имаат право да го управуваат сообраќајот заедно со американскиот сојузник Оман, кој е од другата страна на стратешкиот воден пат, и ќе ги воведат таксите кон средината на август, кога ќе истече 60-дневниот период.

„Суверенитетот на Ормуската Теснина им припаѓа на Иран и Оман, а сообраќајот во неа е предмет на договори утврдени од Иран“, изјави главниот преговарач на Иран, Мохамед Бакер Калибаф, на државната телевизија.

Американскиот потпретседател Џ.Д. Венс изјави дека на Иран ќе биде спречен да наплаќа такси за меѓународен воден сообраќај.

Венс, во интервју снимено во понеделникот, но објавено вчера, исто така рече дека транспортот на нафта низ Ормуската Теснина се вратил на нивоата од пред војната, дури и ги надминал во некои денови.

МИА