ЕУ постигна договор за олеснување и одложување на дел од правилата за вештачка интелигенција

Земјите членки на Европската Унија и законодавците од Европскиот парламент постигнаа договор за олеснување на клучните правила за вештачка интелигенција, вклучително и за одложување на нивната примена, по притисокот од одредени влади и компании.

„Кипарското претседателство, кое го претставува Советот, и преговарачите од Европскиот парламент штотуку постигнаа привремен договор за предлогот насочен кон поедноставување и олеснување на одредени правила поврзани со вештачката интелигенција“, се наведува во соопштението на Кипар, кој моментално претседава со ЕУ.

Земјите-членки и преговарачите се договорија и да ја забранат употребата на апликации за вештачка интелигенција за создавање сексуални „дипфејк“ (deepfake) содржини без согласност на лицата прикажани во нив. Критичарите оценуваат дека олеснувањето на дел од правилата покажува дека Европа попушта под притисокот на големите технолошки компании.

Привремениот договор, кој треба формално да биде одобрен од владите на ЕУ и од Европскиот парламент во наредните месеци, беше постигнат по деветчасовни преговори. Марилена Рауна, заменик-министерка за европски прашања на Кипар, изјави дека договорот за Законот за вештачка интелигенција значително ги поддржува компаниите преку намалување на административните трошоци.

Измените на Законот за вештачка интелигенција, кој стапи во сила во август 2024 година, се дел од напорите на Европската комисија за поедноставување на новите дигитални правила по поплаките од бизнис-заедницата за бирократски пречки.

Владите и европратениците се договорија примената на правилата за високоризичните системи, како оние поврзани со биометрија и критична инфраструктура, да биде одложена до 2 декември 2027 година, наместо првично планираниот рок до август годинава. Исто така, беше договорено машините да бидат изземени од опфатот на овој закон бидејќи веќе се регулирани со секторски правила.

Задолжителното означување на содржините генерирани со вештачка интелигенција со „воден жиг“ ќе започне да се применува од 2 декември. И покрај овие измени, правилата на ЕУ за вештачка интелигенција и понатаму се сметаат за најстроги во светот.

МИА