Британскиот премиер разгледува можност за јавна истрага за активностите на Џефри Епстин во Велика Британија

Британскиот премиер Енди Бернам ја разгледува можноста за отворање јавна истрага за активностите во Велика Британија на починатиот осуден сексуален престапник Џефри Епстин – изјави денеска министерката за жртви Алекс Дејвис-Џонс за Би-Би-Си.

Таа рече дека премиерот „ја разгледува“ можноста за таква истрага и дека се согласил да се сретне со жртвите на Епстин.

– Добив уверување дека премиерот многу сериозно пристапува кон ова прашање. Тој ќе се сретне со жртвите и ја разгледува можноста за понатамошни чекори, сега кога како премиер има пристап до сите релевантни информации – изјави Дејвис-Џонс.

Таа додаде дека за можноста за јавна истрага разговарала со Бернам и со секретарката на кабинетот, Дејм Антонија Ромео, по нејзиното повторно именување за министерка за жртви.

Дејвис-Џонс во мај поднесе оставка од владата на поранешниот премиер Сер Кир Стармер, обвинувајќи ја тогашната администрација дека не ги слушала преживеаните жртви на Епстин.

Таа истакна дека Бернам се согласил да работи на системски промени кои ќе ја подобрат поддршката за сите жртви.

МИА